套住珍珠末塊皮嘅類固醇

珍珠末係一種好傳統好傳統嘅護膚用品,外服內用都話可以美顏養生,睇到我都覺得超吸引。但最近就俾政府化驗所驗到有一隻好明顯係 DIY 嚟賣,個名叫「珍珠藥膏」嘅護膚品含有類固醇成份。

依個賣家來路不明但非常聰明,佢利用珍珠末可以美顏養生甚至對抗濕疹個說法,然後背後偷偷加入真係「做到嘢」嘅類固醇,幫你美顏養生丶對抗濕疹。

點解我會咁講:

因為珍珠末護膚講就勁,但實際上唔係個個用完都真係有又快又好嘅效果,喺科學上冇「可重覆性」,所以賣家諗啲辦法去令成件事快靚正。

最易諗到嘅,就係類固醇。類固醇快速對抗濕疹敏感係真正喺皮膚科上應用嘅藥物,係真有效。

而用家搽完該款珍珠藥膏(其實含類固醇),唔洗用都知,一定好快有效果。有濕疹一定好快退,冇濕疹一定好快皮膚又白又滑,好似剝殼雞蛋咁。

用家們一開始一定用得好 Happy,以為珍珠末真係好勁揪,但唔講珍珠末,其實類固醇已經做晒所有佢想要嘅功效。

如果用家長期當普通面霜用,就係一個錯到不得了嘅類固醇使用,必定會出現大家都知大家都懂大家都覺得自己試過的類固醇過量問題,如果停用,更加會出現更大問題。

賣家個如意算盤就係等用家覺得一停用珍珠末,皮膚就變差,然後要繼續買。

當然依啲只係少數害群之馬,絕對唔代表所有珍珠膏都有類固醇,但亦都唔代表其他 DIY 護膚品都一定冇偷偷加類固醇。

所以購買時一定要千萬小心,來歷不明嘅鋪頭就最好唔好買。

類固醇其實都唔可怕,可怕嘅係用錯方法。

延伸閱讀:【敏感濕疹】類固醇上癮丶反彈的誤解,錯的並非類固醇

衞生署呼籲市民切勿購買或使用含有未標示受管制成分的外用產品(附圖)

其實護膚品偷加類固醇事件都唔係第一次發生,回帶 2016 年新聞
熱賣護膚品疑含類固醇 逾廿用家停用後即爛面

套住珍珠末塊皮嘅類固醇

發佈留言